ಕಡಲಪ್ಪೆನೆ ನಂಬುದು ಓಡನ್ ನೀರ್‌ಗ್ ಜಪ್ಪಾಯ
ಕಟೀಲಪ್ಪೆನೆ ನಂಬುದು ಬದ್‌ಕ್‌ನ್ ನಮ ನಡಪಾಯ
ಕೋಟಿ ಚೆನ್ನಯ ದೈವೊಲು ನಿಲೆಯಾಯಿ ನಾಡ್ ನಮನ
ಪರಶುರಾಮನ ಕುಡರಿಡ್ ಪುಟ್ಟಿನ ನಾಡ್ ನಮನ
ತ್ಯಾಗೊದ ರೂಪೊಡು ಉಂತಿನ ಕಾರ್ಲದ ಗೊಮ್ಮಟಸ್ವಾಮಿ
ಬಂಜಿ ನಿಲಿಕೆ ನುಪ್ಪು ಕೊರ್ಪುನ ಧರ್ಮಸ್ಥಳ ಮಂಜುನಾಥ ಸ್ವಾಮೀ

ಆಟಿ ಅಮಾಸೆದ ಕತ್ತಲೆಡ್ ಬೊಲ್ಪಾದ್ ಬತ್ತಾನ ಆಟಿಕಳಂಜಾ
ನಂಬಿ ಭಕ್ತೆರೆಗ್ ಕೈಪತ್‌ದ್ ನಡಪಾಯನ ಸ್ವಾಮೀ ಕೊರಗಜ್ಜ
ಕೋರಿ ರೊಟ್ಟಿನ್ ತಂಬಿಲಡ್ ತಿನ್‌ಪುನ ಏತ್ ಪೊರ್ಲು
ಕೆಸರ ಕಂಡಡ್ ಗತ್ತ್‌ಡ್ ಬಲಿಪುನ ಎರುಕುಲು ವಾಪೊರ್ಲು
ಅಬ್ಬಲಿಗೆ ದೀದ್ ಪೊಣ್ಣುಲೆನ ಮೋನೆಡ್ ತೆಲಿಕೆ
ತಾರಾಯಿ ಬಜ್ಜೇಯಿ ಬಾನಗ್ ತಾಗ್ಂಡ್ ನಲಿಕೆ

ಸಿರಿ ಕಟ್ಟ್‌ದ್ ಕೋಲಡ್ ನಲಿಪುನ ಪಂಜುರ್ಲಿನ ಗಗ್ಗರ
ಆಟಡ್ ಮಹಿಷಾಸುರನ್ ಕೆರಿನ ದುರ್ಗೆನ ಅಬ್ಬರ
ಶಾಂಭವಿ-ನೇತ್ರಾವತಿ ಪರಪುನ ತೂಯರಾ?
ಕನಕನ ಕಿಂಡಿಡ್ ಕೃಷ್ಣನ್ ತೂವರೆ ಬರುವರಾ?
ಬಂಗುಡೆ-ಬೂತಾಯಿಡ್ ಜಿಂಜಿದಿನ ಕಡಲ್
ಮದಿಮಲ್‌ನ ಇಲ್ಲದ ಎದುರು ದೊಂಪದ ಮಡಲ್

ತುಳುನಾಡ್‌ನ್ ನಿಕ್ಕ್ಂದೇ ಬುಡುದು ಕೊರ್ತ ನಾಗ ದೇವೆರೆ
ನಿನ್ನ ಮುಂಡಡ್ ಗಂಧ ಇಪ್ಪಡ್ ಯಾನ್ ಉಲ್ಲೆ ಪನ್ಪಿನ ಧರ್ಮ ದೇವೆರೆ
ಪೂರ ಗೌಜಿ ಗಮ್ಮತ್‌ಡೆ ತೂತರ್ ಚಂಡಿ ಕೋರಿ
ಆಂಡ ಏರೆಗ್‌ಲಾ ಮುಟ್ಟರೆ ಆವಂದ್ ನಮನ ಕಟ್ಟದ ಕೋರಿ
ಪಚ್ಚೆ ಪಜಿರ್‌ಡೆ ಜಿಂಜಿನ ಬಂಗಾರ್‌ದ ನಾಡ್
ಈ ಎನ್ನ ಮೋಕೆದ ತುಳುನಾಡ್
ಜೈ ತುಳುನಾಡ್